2022 წლის ავსტრალიის ღია პირველობის ფინალის წაგების შემდეგ, დანილ მედვედევი ზუსტად 1 წელი “წვალობდა” საჩოგბურთო კორტებზე, ცდილობდა ძველი სათამაშო რიტმი დაეჭირა და ეს როგორც იქნა შეძლო.
უკანასკნელი 2 კვირის განმავლობაში რუსმა ჩოგბურთელმა 2 ტურნირის მოგება მოახერხა და კარიერული მე-16 და მე-17 ტიტულები მოიგო. გასულ კვირას მან როტერდამის ღია პირველობა დაასრულა ტრიუმფით, დღეს კი დოჰას პრესტიჟული ტურნირი.
დოჰას ტურნირის ფინალში დანილმა 6:4 6:4 სძლია მსოფლიო რეიტინგის ყოფილ პირველ ჩოგან – ენდი მარეის.
გადამწყვეტ მატჩამდე ბრიტანელი გმირულად იბრძოდა – 2 წრეში ჯამში 8 მატჩპოინტი გადაარჩინა, 4 მატჩის მოგება კი 3 სეტიან ბრძოლებში შეძლო.
მედვედევთან შეხვედრაში ენდის ცოტა დააკლდა, რათა ორმაგი ბრეიკი ამოექაჩა პირველ სეტში, მეორე პარტიაში – ერთი უკუბრეიკი შეასრულა, თუმცა შეხვერა მაინც წააგო.
უკანასკნელი 14 დღის განმავლობაში დანილმა 750 სარეიტინგო ქულა გამოიმუშავა – ეს კი მისი საუკეთესო შედეგია ავსტრალიის ღია პირველობის ფინალში გასვლის შემდეგ.
ორშაბათს, რუსი ჩოგბურთელი დაუბრუნდება რეიტინგის ტოპ 10-ს და მსოფლიოს მეშვიდე ჩოგანი გახდება 3320 ქულით.
2021 წლის შემდეგ, პირველად მედვედევს 9 მატჩიანი მოგებათა სერია გააჩნია. ძალიან მნიშვნელოვანი ფაქტორია, რომ ამ მოგებათა სერიაში 2 გამარჯვება ტოპ 10-ის წევრებთან არის მოპოვებული.
დანილმა სათამაშო რიტმი იპოვა, მისი გაჩერება კი ძალიან რთული იქნება.