დევისის თასის ნახევარფინალში ხორვატია სერბეთს შეხვდება

ძალიან საინტერესოდ მიმდინარეობს დევისის თასი ფინალური ტურნირი. მადრიდში მესამე მეოთხედფინალი შედგა, სადაც ერთმანეთს სერბეთის და ყაზახეთის დანკრებები დაუპირისპირდნენ.

პირველები კორტზე მიხაილ კუკუშკინი და მიომირ კეჩმანოვიჩი გამოვიდნენ. სერბს უკეთესი სტარტი გამოუვიდა – ადრეული ბრეიკი შეასრულა და 2:0 დაწინაურდა. კუკუშკინი დროულად გამოფხიზლდა და მალევე აღადგინა წონასწორობა – 2:2. პირველი სეტის ბედი ტაიბრეიკზე გადაწყდა, სადაც ერთადერთი მინიბრეიკი ყაზახმა შეასრულა და პარტიაც მოიგო 7:6.

მიხაილმა მეორე სეტიც წარმატებით დაიწყო და 6 ნათამაშები გეიმის შემდეგ 4:2 დაწინაურდა, თუმცა ნაადრევად ჩათვალა მატჩი მოგებულად, მოდუნდა და ამისთვის მწარედ დაისაჯა – მიომირმა ზედიზედ 4 გეიმის მოგებით სეტი ააცალა მეტოქეს და ანგარიშიც გაათანაბრა 1:1 (6:7 6:4).

მესამე სეტი დრამატული გამოდგა – სერბმა ჩოგბურთელმა საწყისი 3 გეიმი მოიგო და სოლიდური სხვაობით დაწინაურდა. 5:3-ზე კეჩმანოვიჩი მატჩზე აწვდიდა და ორმაგი მატჩბოლიც ქონდა, თუმცა გამოცდილმა ყაზახმა გაუძლო ამ წნეხს, უკუბრეიკი შეასრულა და მალე სეტი ტაიბრეიკზეც გადავიდა.
„საჩოგბურთო ლატარეა“ ნამდვილ შოუდ იქცა – 6:5-ზე და 7:6-ზე მიომირს კიდევ 2 მატჩპოინტი ქონდა, თუმცა კუკუშკინმა ეს საფრთხეც მოიგერია. შემდეგ ყაზახის დროც დადგა – მიხაილი ზედიზედ 4-ჯერ მივიდა მატჩბოლამდე, თუმცა უშედეგოდ. მეხუთე მატჩპოინტზე კუკუშკინმა მაინც მოახერხა თავისი შანსის გამოყენება და ყაზახეთს ქულა მოუტანა 7:6 4:6 7:6.

სერბეთს უკანდასახევი გზა არ ქონდა და კორტზე მსოფლიო რეიტინგის ლიდერი – ნოვაკ ჯოკოვიჩი გამოუშვა, რომელმაც ყველანარი გართულების გარეშე, ორ სეტში 6:3 6:4 სძლია ალექსანდრ ბუბლიკს და სერბეთ-ყაზახეთს შორის ანგარიშიც გაათანაბრა 1:1.

1/2 ფინალის საგზურის მფლობელი წყვილთა შეხვედრას უნდა გაერკვია – ჩაჩიჩი/ჯოკოვიჩის დუეტი გოლუბევ/ნედავესოვის ტანდემის წინააღმდეგ.
პირველი სეტი სერბებმა მოიგეს ანგარიშით 6:2, მეორე პარტიაში უკვე ყაზახებმა მოიგეს ანალოგიური ანგარიშით.

მესამე, გადამწყვეტ სეტში ნოვაკ ჯოკოვიჩის მაღალამა სათამაშო კლასმა თავისი „სიტყვა თქვა“ – „ნოლემ“ პირადად მოიგო რამდენიმე რთული გათამაშება, მე-5 და მე-9 გეიმებში ბრეიკი მოაპოვებინა სერბეთს და მატჩი საბოლოო გამარჯვებამდე მიიყვანა 6:2 2:6 6:3.

სერბეთმა ურთულეს ბრძოლაში გაიარა ყაზახეთის ბარიერი (2:1) და ნახევარფინალში ხორვატიას შეხვდება. საჩოგბურთო ინტრიგის გარდა, პოლიტიკური ინტრიგაც საკმაოდ დიდია, როდესაც ბადის საპირისპირო მხარეს ხორვატები და სერბები დადგებიან.