ემანუელ ჯინობილი „სან ანტონიოში“ ბრუნდება

ნბა-ს კლუბ „სან ანტონიოს“ ლეგენდარული არგენტინელი კალათბურთელი ემანუელ ჯინობილი „სპურსში“ ბრუნდება – ინფორმაციას ავრცელებს ESPN-ის ინსაიდერი ადრიან ვოჟნაროვსკი.

ჯინობილი „სან ანტონიოს“ შემადგენლობაში მყოფი მოთამაშეების განვითარებაზე იზრუნებს, როგორც მოედანზე, ასევე მის მიღმაც.

შეგახსენებთ, რომ 44 წლის „მანუ“ ნბა-ს 4-გზის გამარჯვებულია „სან ანტონიოს“ რიგებში (2003, 2005, 2007, 2014 წლები), 2008 წელს კი ლიგის საუკეთესო მეექვსე მოთამაშის ტიტული მიიღო. ჯინობილიმ ნბა-ს ყველა ვარსკვლავთა მატჩში ორჯერ ითამაშა (2005, 2011 წლებში) და ასევე ორჯერ მოხვდა სეზონის სიმბოლურ, მესამე ხუთეულში (2008, 2011 წლები).

არგენტინელ კალათბურთელთან მოლაპარაკების პროცესში აქტიურ მონაწილეობას იღებდნენ „სპურსის“ მთავარი მწვრთნელი გრეგ პოპოვიჩი, გენერალური დირექტორი – არ სი ბუფორდი და გენერალური მენეჯერი ბრაიან რაიტი.

გაცნობებთ, რომ ემანუელ ჯინობილიმ საკალათბურთო კარიერა 2018 წელს დაასრულა და უკანასკნელი 3 წლის განმავლობაში „დასვენების რეჟიმში“ იყო გადასული.