საფრანგეთის ქალაქ ლიონში გრძელდება ქალთა 250-იანთა კატეგორიის ტურნირი.
მეორე რაუნდის მატჩში ალისია პარკსმა მძიმე ბრძოლაში 2:6 7:6 6:2 სძლია პეტრა მარტიჩს და მომდევნო ეტაპის საგზური მოიპოვა.
მატჩის ფავორიტად ხორვატი ჩოგბურთელი მიიჩნეოდა, რომელმაც შეხვედრა იდეალურად “გახსნა” – ზედიზედ 4 გეიმი მოიგო და უდიდეს უპირატესობას მიაღწია.
ალისია მოგვიანებით გამოფხიზლდა, თუმცა სეტი მაინც დათმო 2:6.
მეორე პარტიაში თამაშის ხასიათი შეიცვალა – ორივე ჩოგბურთელი დამაჯერებლად იგებდა გეიმებს საკუთარ ჩაწოდებაზე. სეტმა ბრეიკპოინტების გარეშე “გაირბინა” და გამარჯვებულის გამოსავლენად ტაიბრეიკი დაინიშნა.
საჩოგბურთო ლატარეაში პარკსმა მეტოქეს 7:3 აჯობა და სეტებს შორის ანგარიში გაათანაბრა 1-1 (2:6 7:6).
მესამე, გადამწყვეტყი პარტიის სტარტზე მარტიჩს მეტოქის ჩაწოდებაზე 3 ბრეიკპოინტი გააჩნდა, თუმცა მათი რეალიზება ვერ შეძლო.
ამერიკელმა ჩოგბურთელმა ვერ გამოყენებული შანსების გამო პეტრა მალევე დასაჯა – 2:2-დან ზედიზედ 4 გეიმი მოიგო და მასთან ერთად მატჩიც.
პარკსმა ზედიზედ მე-12 მატჩი მოიგო, რომელიც დარბაზში ჩატარდა.
2022 წლის მიწურულს ალისიამ ანდორას და ანჟეს ტურნირების მოგება მოახერხა.
22 წლის ამერიკელი კარიერაში მეორედ გავიდა WTA-ს 250-იანთა კატეგორიის ტურნირის 1/4 ფინალში.(პირველი მეოთხედფინალი შარშან, ოსტრავას ტურნირზე დაფიქსირდა, როდესაც პლიშკოვას და საკარის მოუგო ალისიამ).
ლიონის ტურნირის 1/4 ფინალში პარკსის მეტოქე კოვინიჩი/ბონდარს შორის გამარჯვებული იქნება.