ხვიჩა კვარაცხელიამ ნაპოლიში მორიგი წარმატებული მატჩი ჩაატარა. სპალეტის გუნდი სასუოლოს ესტუმრა და 2:0 დაამარცხა, ანგარიში სწორედ ქართველმა შემტევმა გახსნა.
ეს გოლი კვარაცხელიასთვის სერია ა-ში მე-10 გახლავთ. აღსანიშნავია, რომ ხვიჩა პირველი ქართველი ფეხბურთელი გახდა, რომელმაც ტოპ 5 ჩემპიონატის 1 სეზონში ამდენი გოლი შეაგდო. მანამდე საუკეთესო მაჩვენებლები 9-9 გოლით ალექსანდრე იაშვილს ბუნდესლიგაში და გია გურულს ლიგა 1-ში ჰქონდათ.
კვარაცხელია ბრწყინვალე ფორმაშია. ხვიჩამ ნაპოლის მაისურით ოფიციალურ მატჩებში 24 მატჩი ჩაატარა, 12 გოლი გაიტანა და ამდენივე საგოლე გადაცემა გააკეთა. ნაპოლი უახლოეს მატჩს ჩემპიონთა ლიგის 1/8 ფინალში აინტრახტთან გამართავს.