დღეს სტარტს აიღებს ინდიან-უელსის მასტერსი. პირველ სათამაშო დღეს საქმეში ქალები ჩაერთვებიან(WTA), ხოლო ხვალიდან ტურნირს მამაკაცებიც შემოუერთდებიან (ATP).
სამწუხაროდ ქალთა ერთეულთა ბადეში წარმომადგენელი არ გვეყოლება, რადგან მარიამ ბოლქვაძემ საკვალიფიკაციო ეტაპი ვერ გადალახა, მამაკაცთა ბადეში კი განთესილთა შორის მოხვდა ნიკოლოზ ბასილაშვილი.
ქართველი ჩოგბურთელი ინდიან-უელსის მასტერსზე 29-ე ნომრად არის განთესილი და პირველი წრიდან თავისუფალია. მეორე რაუნდში კი ან ეგორ გერასიმოვს, ანდაც კვალიფიკანტს შეხვდება. მესამე რაუნდში გასვლის შემთხვევაში ნიკას სავარაუდო მეტოქედ ფელიქს ოჟე ალიასიმი მოსჩანს, ხოლო 1/8 ფინალში ესპანელი პაბლო კარენო ბუსტა.
ტურნირზე პირველ ნომრად რუსი დანილ მედვედევია განთესილი, რომლის პირველი მეტოქეც დაკვორტ/მაკდონალდს შორის გამარჯვებული იქნება. მსოფლიო რეიტინგის მეორე ჩოგანს ბადეში ყავს თანამემამულე ასლან კარაცევი და ანდრეი რუბლიოვი.
მასტერსზე მეორე ჩოგნად სტეფანოს ციციპასია განთესილი, რომელიც პირველი წრიდან თავისუფალია, მეორე რაუნდში კი ან პედრო მარტინესს, ანდაც რომელიმე კვალიფაერს დაუპირისპირდება. ბერძენის პულში არიან ფაბიო ფონინი და ალექს დე მინორი.
:focal(529x445:531x443)/origin-imgresizer.eurosport.com/2021/10/04/3231720-66151668-2560-1440.jpg)
საკმაოდ რთული ბადე შეხვდა გერმანელ ალექსანდრ ზვერევს, რომელიც მეორე წრეში სავარაუდოდ კანადელ ჯექსონ ბრუკსბის დაუპირისპირდება, ხოლო მესამე რაუნდში ესპანელ ფენომენს – კარლოს ალკარასს.
ტურნირზე ვაილდ ქარდი მიიღო მსოფლიო რეიტინგის ყოფილმა პირველმა ჩოგანმა ენდი მარეიმ, რომელიც პირველ წრეში ადრიან მანარინოს შეხვდება.