საღამო, რომელიც სამუდამოდ ჩაეწერა NBA-ს მრავალფეროვან ისტორიაში.
„გოლდენ სტეიტის“ გამთამაშებელმა სტეფ კარიმ „ნიუ იორკთან“ მატჩში, პირველი მეოთხედის დასრულებამდე 7:33 წუთით ადრე მეორე სამქულიანი „ჩასვა“ კალათში და ლიგის ისტორიაში გახდა ყველაზე მეტი სამქულიანის ჩამგდები კალათბურთელი.
სტეფ კარი – NBA-ს ყველა დროის საუკეთესო სნაიპერი. „გოლდენ სტეიტის“ ოქროს ბიჭუნას 789 მატჩის ჩატარება დასჭირდა, რათა გაეუმჯობესებინა რეი ალენის რეკორდი.
ისტორიული სამქულიანის ჩაგდების შემდეგ „ვორიორზის“ კალათბურთელმა მაშინვე გამიზნული პერსონალური ფოლი აიღო , რათა მწვრთნელს წუთშესვენება აეღო და სტეფს მისცემოდა საკუთარი რეკორდის აღნიშვნის შესაძლებლობა. პარკეტზე შემოვიდა გუნდის მთავარი მწვრთნელი სტივ კერი, სტეფის მამა – დელ კარი, რეი ალენი, რეჯი მილერი და ყველამ ერთად მიულოცა ახალ რეკორდსმენს ტიტული – ლიგის სნაიპერებს ახალი მეფე ყავთ – სტეფ კარი.
“გოლდენ სტეიტმა” მატჩი 105-96 მოიგო, სტეფ კარიმ კი ისტორიული სამქულიანის შემდეგ კიდევ სამჯერ გაისროლა ზუსტად შორი დისტანციებიდან და მატჩი 22 ქულით “დახურა”.
“ვორიორზის” გამთამაშებელი ისტორიული რეკორდის დასამყარებლად ამაზე უკეთესს ადგილს ნამდვილად ვერ აირჩევდა – საკალათბურთო მექად წოდებული “მედისონ სქვერ გარდენი”.