უკრაინელის თვალით: ხვიჩაზე, სტუმართმოყვარეობაზე, სიზარმაცეზე…

უკრაინელი დმიტრო ივანისენია გემახსოვრებათ: რამდენიმე წლის წინ თბილისის დინამოში თამაშობდა.  მერე ისე მოუმატა, რომ ანდრეი შევჩენკომ ნაკრებშიც კი გამოიძახა. ივანისენია ნახევარმცველია, ახლა რუსულ კრილიაში თამაშობს.

მან meta ratings-თან ინტერვიუში ქართულ ფეხბურთზეც ისაუბრა.

-ამბობდით, რომ ქართველ ფეხბურთელებს წინსვლაში სიზარმაცე და ადგილობრივი სამზარეულო უშლით ხელს. კერძოდ რაში გამოიხატება?

– მენტალიტეტია ასეთი. საქართველო მზიანი ქვეყანაა, სტუმართმოყვარე ხალხია. ჩვენთან არცერთ გუნდში ახალწვეულს არ პატიჟებენ, საქართველოში კი პირიქით. თუმცა ახალგაზრდა ტალანტები 17-18 წლის ასაკში აღწევენ პროგრესს, თბილისის დინამოში იწყებენ თამაშს და მერე ჩერდებიან. ერთ-ერთი მთავარი მიზეზი, რა თქმა უნდა, მომავლის არასწორად დაგეგმვა და არაპროფესიონალიზმია.

– ხვიჩა კვარაცხელიას წინაარმდეგაც მოგიწიათ თამაში. მაშინვე ეტყობოდა, რომ სუპერტალანტი იყო?

– იმ თამაშის მიხედვით ვერ იტყოდი, მაგრამ ეტყობოდა, რომ კარგი მონაცემები ჰქონდა და შეეძლო, მომავალში ძლიერი ფეხბურთელი დამდგარიყო.

– დინამო-კოლხეთის მატჩის (6:3) მერე მეტოქის 5 ფეხბურთელს თამაშის ჩაწყობის გამო დისკვალიფიკაცია მისცეს. თქვენ რატომ არ ითამაშეთ კოლხეთის წინააღმდეგ არცერთი მატჩი?

– სიმართლე გითხრათ, არ მახსოვს. ეს 4 წლის წინ იყო. თუ გამოვტოვე, ესე იგი, გაფრთხილებების გამო. მახსოვს, ტელევიზიით აჩვენეს, რომ ერთ-ერთი სხვა მატჩის ჩაბნელებულ გასახდელში შევიდნენ ძალოვანები, თან ნიღბები ეკეთათ და იქიდან გამოიყვანეს გარიგებული შეხვედრების ორგანიზატორები. დინამოში ასეთი რამ ვერ მოხდებოდა და არც მახსოვს, რომ იოლი თამაში როდესმე გვქონოდა.

Leave a comment

Your email address will not be published.