გუშინ, Australian Open-ზე დიდი სენსაცია დაფიქსირდა – პირველ ნომრად განთესილმა რაფაელ ნადალმა 3 სეტში წააგო მაკენზი მაკდონალდთან და ასპარეზობას გამოეთიშა.
მოულოდნელი შედეგები დღესაც გაგრძელდა – ავსტრალიის ღია პირველობას ტოვებს მსოფლიო რეიტინგის მესამე ჩოგანი – კასპერ რუუდი.
ნორვეგიელმა ჩოგბურთელმა, უმძიმეს, 4 საათიან ბრძოლაში 3:6 5:7 7:6 2:6 წააგო ჯენსონ ბრუკსბისთან.
შეხვედრის სტარტზე კასპერი ძალიან ბევრ უნებლიე შეცდომას უშვებდა, რის ხარჯზეც საწყისი 2 სეტი დათმო 3:6 5:7.
მესამე პარტიაში ბრუკსბი ორჯერ იგებდა ბრეიკით (2:0, 4:2), თუმცა ორივე შემთხვევაში რუუდმა უკუბრეიკი შეასრულა. სეტის ბედი ტაიბრეიკზე გადაწყდა, სადაც ნორვეგიელმა 7:4 იმარჯვა.
მეოთხე პარტიაში ბრძოლა ფაქტიურად არ ყოფილა – ამერიკელმა საწყისი 6 გეიმიდან 5 მოიგო და შემდეგ უპრობლემოდ მიიყვანა შეხვედრა ლოგიკურ გამარჯვებამდე 6:3 7:5 6:7 6:2.
ჯენსონ ბრუკსბიმ კარიერაში პირველად მოუგო ტოპ 10-ის წარმომადგენელს და ავსტრალიის ღია პირველობის მესამე წრეში თანამემამულე ტომი პოლს შეხვდება.
მოულოდნელი შედეგები დაფიქსირდა ქალთა ერთეულთა თანრიგის ბადეშიც – ასპარეზობას ნაადრევად გამოეთიშა ტოპ 10-ის ორი რუსი წარმომადგენელი: დარია კასატკინა და ვერონიკა კუდერმეტოვა.
კასატკინამ პირველი რაუნდის მატჩში 1:6 1:6 განადგურდა გრაჩევასთან, ხოლო კუდერმეტოვამ მეორე წრის შეხვედრაში წააგო კეტი ვოლინეცთან 4:6 6:2 6:2.
